चुनावी तयारी तीव्र: फागुन २१ को चुनावमा एमाले अर्घाखाँची सक्रिय, एमाले अर्घाखाँचीबाट रायमाझीसहित ५ जनाको नाम सिफारिस (तस्बिर सहित )

-अर्घाखाँची डटकम सम्बाददाता।

अर्घाखाँची । आगामी फागुन २१ गते हुने प्रतिनिधि सभा सदस्य निर्वाचनका लागि नेकपा (एमाले) जिल्ला कमिटी अर्घाखाँचीले उम्मेदवार सिफारिस गरेको छ ।

जिल्ला कमिटीको सातौँ पूर्ण बैठकले पार्टीको केन्द्रीय नीति, निर्देशन तथा मापदण्डअनुसार प्रतिनिधि सभा सदस्यका उम्मेदवारका रूपमा पाँच जनाको नाम सिफारिस गर्ने निर्णय गरेको हो ।

सिफारिस हुने उम्मेदवारहरूमा पूर्व मन्त्री टोपबहादुर रायमाझी, पीताम्बर भुसाल, बोमबहादुर विश्वकर्मा, भोजबहादुर शाह र बिजुला रायमाझी रहेका छन् ।

जिल्ला कमिटीका अनुसार पार्टीभित्र व्यापक छलफल, संगठनप्रतिको योगदान, जनसमर्थन, राजनीतिक अनुभव र निर्वाचन जित्ने सम्भावनालाई आधार मानेर उम्मेदवार सिफारिस गरिएको हो ।

जिल्ला कमिटीले हाल भुटानी शरणार्थी प्रकरणमा पुर्पक्षका लागि थुनामा रहेका पुर्व मन्त्री टोपबहादुर रायमाझी, पिताम्बर भुसाल, वोम बहादुर विक, निवर्तमान सांसद विजुला रायमाझी र भोज बहादुर शाह सिफारिस गरेको छ ।

२०७९ मा भएको निर्वाचनमा एमालेबाट टोप बहादुर रायमाझीले ४२ हजार ६७५ मत प्राप्त गरेर विजयी भएका थिए । उनले नेपाली काँग्रेसकी पुष्पा भुसाललाई पराजित गरेका थिए । भुसालले ४० हजार ९४५ मत प्राप्त गरेकी थिइन् ।

सिफारिस गरिएका नामहरू अब पार्टीको केन्द्रीय कमिटीमा पठाइने छन् र अन्तिम निर्णय केन्द्रीय नेतृत्वबाट हुने जनाइएको छ ।

बैठकले आगामी निर्वाचनलाई लक्षित गर्दै पार्टी संगठनलाई थप सुदृढ बनाउने, अनुशासित र सक्रिय कार्यकर्तामार्फत जनतासँग प्रत्यक्ष सम्बन्ध विस्तार गर्ने तथा चुनावी अभियानलाई प्रभावकारी ढंगले अघि बढाउने निर्णयसमेत गरेको छ ।

एमाले अर्घाखाँचीले आगामी प्रतिनिधि सभा निर्वाचनमा पार्टीलाई विजयी गराउने लक्ष्यसहित संगठन मजबुत बनाउँदै जनमुखी एजेन्डासहित चुनावी मैदानमा उत्रने प्रतिबद्धता व्यक्त गरेको छ ।

थप तस्बिर :

#ArghakhanchiCom #ArghakhanchiDotCom #Arghakhanchi #UMLArghakhanchi #Election2082 #SansadElection #CandidateRecommendation #TopBahadurRaimajhi #UMLNepal #NepalPolitics