पौष ३० गते, २०६८ मा प्रकाशित
नेपाली पक्षले भ्रमणबारे पहिल्यै जानकारी दिएको भन्दै असन्तुष्ट चिनियाँ प्रधानमन्त्री वेन शनिबार करिव पाँच घण्टाका लागिमात्रै नेपाल आउन लागेका हुन् । यसअघिको भ्रमण स्थगनपछि नेपाल वेन आगमनको ‘सकारात्मक’ पखाईमा थियो ।
भ्रमण कार्यक्रम भने परराष्ट्र मन्त्रालयले गोप्य राखेको छ । चिनियाँ प्रधानमन्त्रीको भ्रमणबारे शुक्रबार प्रधानमन्त्री बाबुराम भट्टराईसँग लामो छलफल गरेका उपप्रधान एवं परराष्ट्रमन्त्री नारायणकाजी श्रेष्ठले पनि स्पष्ट खुलाएनन् । ‘खै, कहाँ आउने कुरा भा’छ ?,’ सञ्चारकर्मीसँग बोल्नै नचाहेका उनले भने, ‘आउने भए त तपाईंलाई भनिहाल्थ्यौं नि ।’
स्रोतका अनुसार बिहान ११ बजे त्रिभूवन अन्तर्राष्ट्रिय विमानस्थल ओर्लने चिनियाँ प्रधानमन्त्री साँझ कतारको राजधानी दोहा जाने कार्यक्रम छ । केही घण्टाको नेपाल बसाइमा वेनले प्रधानमन्त्री बाबुराम भट्टराईसँग सिंहदरवारमै भेट्नेछन् । त्यसको तयारी सिंहदरवारमा देखिन्थ्यो । प्रधानमन्त्री कार्यालयमा शुक्रबार साँझ नयाँ रातो कार्पेट विछ्याइएको छ ।
पुस ५ गतेदेखि हुने भनिएको वेनको पूर्वनिर्धारित भ्रमण सुरक्षाको कारण देखाउँदै त्यसको एक साताअघि नै स्थगित भएको थियो । तिब्बती शरणार्थीको बसोबास रहेको काठमाडौंको सुरक्षामा चिन्ता देखाएपछि उपप्रधान एवं गृहमन्त्री विजयकुमार गच्छदार पुस १० गते विश्वस्त बनाउन बेइजिङ गएका थिए ।
नेपाल र म्यान्मारको एकसाथ हुने भनिएको यसअघिको भ्रमण वेनको व्यस्तताले स्थगित गरिएको भनिएको थियो । यसपटकको भ्रमणमा भने वेन म्यान्मार जाने कार्यक्रम छैन ।
चिनियाँ प्रधानमन्त्रीको भ्रमण स्थगित पछि प्रधानमन्त्री भट्टराई संसद् र आफ्नै पार्टीबाट पनि आलोचित भएका थिए । आफ्नो कार्यकालमा भारत र चीनसँग सम्बन्ध बलियो बनाउने बताउँदै आएका प्रधानमन्त्री पनि आफ्नै कार्यकालमा वेनलाई नेपाल ल्याउने जस लिन चाहन्थे ।
यसअघि सन् २००१ मा चिनियाँ प्रधानमन्त्री झु रोङजी नेपाल आएका थिए । त्यसअघि चिनियाँ राष्ट्रपति जियाङ जेमिन सन् १९९६ मा नेपाल आएका थिए ।
अन्य समाचारहरु
