बैशाख ३१ गते, २०८३ मा प्रकाशित
📸 : केशब पन्थी / अर्घाखाँची डटकम ।
अर्घाखाँची, — राष्ट्रिय मुस्लिम आयोग को आयोजनामा अर्घाखाँचीको सन्धिखर्कमा मुस्लिम समुदायको सशक्तीकरण, अधिकार सुनिश्चितता तथा समुदायले भोगिरहेका समस्या र चुनौतीबारे विस्तृत अन्तरक्रिया कार्यक्रम सम्पन्न भएको छ।
कार्यक्रममा मुस्लिम समुदायका प्रतिनिधिहरूले शिक्षा, रोजगारी, आर्थिक अवसर, स्वास्थ्य सेवा तथा राज्यका सेवासुविधामा अझै पनि आफूहरू पछाडि परेको गुनासो गर्दै आयोग र सम्बन्धित निकायप्रति असन्तुष्टि व्यक्त गरेका छन्।
अन्तरक्रियामा कृष्ण बहादुर घर्ती मगर, जिवनारायण कोइराला, टेकराज पौडेल, सहायक प्रमुख जिल्ला अधिकारी झबिलाल भट्टराई, सन्धिखर्क नगरपालिका–२ का वडाध्यक्ष मोतिजंग रायमाझी, छत्रदेव गाउँपालिका–१ का वडाध्यक्ष काजिबाबु ज्ञावली, छत्रदेव गाउँपालिका–२ का वडाध्यक्ष शंकर पाण्डे तथा पाणिनी गाउँपालिका–८ का वडाध्यक्ष रोमबहादुर पाण्डेलगायतको उपस्थिति रहेको थियो।
त्यसैगरी मुस्लिम समुदायका अगुवा हसरदिन मियाँ, फिरोज खानसहित जिल्लाका विभिन्न स्थानका मुस्लिम समुदायका प्रतिनिधिहरूको उल्लेखनीय सहभागिता रहेको थियो।
कार्यक्रममा सहभागीहरूले मुस्लिम समुदाय अझै पनि शैक्षिक, सामाजिक तथा आर्थिक रूपमा पछाडि रहेको उल्लेख गर्दै राज्यले लक्षित समुदायका लागि व्यवहारिक कार्यक्रम ल्याउनुपर्ने आवश्यकता औँल्याए। उनीहरूले छात्रवृत्ति, सीपमूलक तालिम, स्वरोजगार कार्यक्रम, स्वास्थ्य सेवा तथा आर्थिक सशक्तीकरणका क्षेत्रमा विशेष योजना आवश्यक रहेको बताए।
विशेषगरी समुदायका प्रतिनिधिहरूले राष्ट्रिय मुस्लिम आयोग स्थापना भए पनि अपेक्षाअनुसार प्रभावकारी काम हुन नसकेको गुनासो गरेका थिए। स्थानीय तहमा रहेका वास्तविक समस्या पहिचान गरी समाधानमुखी कार्यक्रम ल्याउन आयोगले सक्रियता देखाउनुपर्ने उनीहरूको माग थियो।
कार्यक्रममा बोल्दै कृष्ण बहादुर घर्ती मगर ले नेपाल बहुजातीय, बहुभाषिक र बहुधार्मिक देश भएकाले सबै समुदायको समान सम्मान र सहभागिता सुनिश्चित हुनु आवश्यक रहेको बताए। उनले मुस्लिम समुदायको सामाजिक, शैक्षिक र आर्थिक विकासका लागि राज्यका निकायहरूबीच समन्वयात्मक रूपमा काम हुनुपर्नेमा जोड दिए।
त्यस्तै जिवनारायण कोइराला ले स्थानीय तह तथा जिल्ला स्तरका निकायहरूले अल्पसंख्यक समुदायका आवश्यकता पहिचान गरी योजनाबद्ध कार्यक्रम सञ्चालन गर्नुपर्ने बताए।
टेकराज पौडेल ले मुस्लिम समुदायका बालबालिकाको शिक्षामा पहुँच विस्तार गर्न स्थानीय तह सकारात्मक रहेको जानकारी दिए।
कार्यक्रममा मुस्लिम समुदायका अगुवाहरूले सामाजिक सद्भाव कायम राख्दै समुदायभित्र शिक्षाप्रति जागरण फैलाउनुपर्ने आवश्यकता औँल्याए। उनीहरूले बालबालिकालाई विद्यालयमा नियमित पठाउन, युवाहरूलाई सीप र उद्यमशीलतासँग जोड्न तथा समुदायलाई आत्मनिर्भर बनाउने कार्यक्रम आवश्यक रहेको धारणा राखेका थिए।
कार्यक्रमको अध्यक्षता महमदिन अली ले गरेका थिए। स्वागत मन्तव्य आयोगका केन्द्रीय सदस्य मोहम्मद समशुल हकले राखेका थिए भने कार्यक्रम सञ्चालन आयोगका कर्मचारी उपसचिव शोभा कुमारी पोखरेलले गरेकी थिइन्।
सहभागीहरूले यस्ता अन्तरक्रिया कार्यक्रमले स्थानीय तहका समस्या राष्ट्रिय स्तरसम्म पुर्याउन मद्दत पुग्ने विश्वास व्यक्त गरेका छन्।
समुदायका आवाजलाई नीति निर्माण र कार्यक्रम कार्यान्वयनसँग प्रभावकारी रूपमा जोड्न सके मात्रै मुस्लिम समुदायको वास्तविक सशक्तीकरण सम्भव हुने निष्कर्ष कार्यक्रमले निकालेको थियो।
अन्य समाचारहरु
