आश्विन ६ गते, २०८३ मा प्रकाशित
-अनिल नेपाली, अर्घाखाँची डटकम्
अर्घाखाँची । सन्धिखर्क नगरपालिका–७ ले आर्थिक वर्ष २०८३/८४ का लागि वडाका किसानलाई हिउँदे तरकारीका विभिन्न जातका बीउ वितरण सुरु गरेको छ।
सन्धिखर्क नगरपालिका वडा नं. ७ को आयोजनामा सञ्चालन गरिएको कार्यक्रममा वडाका किसानलाई लक्षित गरी हिउँदे तरकारीका बीउ वितरण गरिएको हो। किसानलाई आज र भोलिसम्म बीउ उपलब्ध गराइने वडा अध्यक्ष चुरा बहादुर केसीले जानकारी दिनुभयो।
वडा अध्यक्ष केसीका अनुसार किसानलाई आफ्नै खेतबारीमा तरकारी उत्पादन गर्न प्रोत्साहित गर्ने, कृषि उत्पादन तथा उत्पादकत्व वृद्धि गर्ने र स्थानीयस्तरमा आत्मनिर्भरता बढाउने उद्देश्यले बीउ वितरण गरिएको हो। वडाले किसानसँग ५० प्रतिशत लागत साझेदारीमा बीउ उपलब्ध गराएको उहाँले बताउनुभयो।
अध्यक्ष केसीले आफू निर्वाचित भएपछि किसानलाई लक्षित गरी कृषि क्षेत्रका यस्ता कार्यक्रमलाई निरन्तरता दिँदै आएको बताउनुभयो। स्थानीय किसानलाई कृषि उत्पादनमा जोड्दै उनीहरूको आयआर्जनमा समेत सहयोग पुर्याउने उद्देश्यले आगामी दिनमा पनि कृषि कार्यक्रमलाई प्राथमिकता दिइने उहाँको भनाइ छ।
वडा सचिव सीता बिसी पराजुलीका अनुसार वडा कार्यालयबाट किसानलाई मुला, प्याज, केराउलगायत हिउँदे तरकारीका बीउ वितरण गरिएको छ। किसानको आवश्यकताअनुसार बीउ उपलब्ध गराइएको उहाँले जानकारी दिनुभयो।
हिउँदे मौसममा उत्पादन हुने विभिन्न तरकारीको खेतीलाई प्रोत्साहन गर्दै किसानलाई घरायसी उपभोगसँगै व्यावसायिक उत्पादनतर्फ आकर्षित गर्ने उद्देश्यले कार्यक्रम सञ्चालन गरिएको वडा कार्यालयले जनाएको छ।
स्थानीयस्तरमै तरकारी उत्पादन बढाउन सके बाहिरी क्षेत्रबाट तरकारी खरिद गर्नुपर्ने अवस्था कम हुनुका साथै किसानको आम्दानीमा समेत वृद्धि हुने अपेक्षा गरिएको छ। आफ्नै खेतबारीमा उत्पादन भएको ताजा तरकारी उपभोग गर्न पाउने भएकाले स्थानीय उत्पादन र आत्मनिर्भरतालाई समेत कार्यक्रमले टेवा पुर्याउने सन्धिखर्क नगरपालिका कृषि शाखा प्रमुख रामबहादुर केसीले बताउनुभयो।
कृषि शाखा प्रमुख केसीले स्थानीय किसानलाई उत्पादनमा जोड्दै व्यावसायिक कृषितर्फ आकर्षित गर्न यस्ता कार्यक्रम महत्वपूर्ण हुने बताउनुभयो। स्थानीय उत्पादन वृद्धि हुँदा किसानको आयआर्जनसँगै बजारमा तरकारीको उपलब्धता बढाउनसमेत सहयोग पुग्ने उहाँको भनाइ छ।
वडा कार्यालयले किसानलाई बीउ उपलब्ध गराउनुका साथै आगामी दिनमा कृषि उत्पादन वृद्धि, किसानको क्षमता अभिवृद्धि तथा स्थानीयस्तरमा कृषि व्यवसाय प्रवर्द्धन गर्ने कार्यक्रमलाई निरन्तरता दिने जनाएको छ।
🌐 Arghakhanchi.com
अन्य समाचारहरु
