प्रधानमन्त्री केपी ओली भारतको राजकीय भ्रमण क्रममा नयाँ दिल्लीमा

भारतीय प्रधानमन्त्री नरेन्द्र मोदीको निमन्त्रणामा प्रधानमन्त्री ओलीले १२ गतेसम्म भारतको राजकीय भ्रमण गर्न लागेका हुन् ।

भ्रमण टोलीमा प्रधानमन्त्री ओलीसँगै पत्नी राधिका, उपप्रधानमन्त्री कमल थापा, अर्थमन्त्री विष्णु पौडेल, गृहमन्त्री शक्ति बस्नेत र प्रधानमन्त्रीका मुख्य सल्लाहकार विष्णु रिमाल रहेका छन् ।

यसैगरी, राष्ट्रिय पुनःनिर्माण प्राधिकरणका प्रमुख कार्यकारी अधिकृत सुशील ज्ञवाली, व्यवस्थापिका-संसदका विभिन्न पार्टीका सदस्य, मुख्यसचिव डा. सोमलाल सुवेदी र सम्बन्धित सचिव तथा विभिन्न मन्त्रालयका उच्चपदस्थ अधिकारी, सन्चारकर्मी तथा व्यापारिक समुदायका प्रतिनिधि पनि भ्रमण दलमा छन् ।

भ्रमणका क्रममा प्रधानमन्त्री ओली भारतीय राष्ट्रपति प्रणव मुखर्जीको निवासमा रहने छन् ।

प्रधानमन्त्रीको भ्रमणका क्रममा दुई देशबीचको ऐतिहासिक सम्बन्ध  सुदृढ पार्नेलगायतका विषयमा छलफल हुनेछ ।

त्यसैगरी, विगतमा सहमति भएका परियोजना र पूरा हुन बाँकी कार्यबारे पनि छलफल हुने बताइएको छ ।

त्यस्तै, आपसी सम्बन्धको चिसोपना अन्त्य, भारतको सहुलियत ऋणको उपयोग, व्यापार र पारवहन, विज्ञान, प्रविधि, स्वास्थ्य र पुनःनिर्माण, सामाजिक र सांस्कृतिक सहयोग आदानप्रदान, पञ्चेश्वर आयोजनाको शीर्ष सन्चालनलगायतका विषयमा छलफल गर्ने तयारी भएको छ ।

प्रधानमन्त्री ओली शुक्रबार बेलुका दिल्ली पुगेपछि त्यहाँ नेपालका राजदूत दीपकुमार उपाध्यायले प्रजातन्त्र दिवसका उपलक्ष्यमा आयोजना गर्ने स्वागत् कार्यक्रममा सहभागी हुनेछन् ।

प्रधानमन्त्री ओली शनिबार भारतीय राष्ट्रपति भवनमा हुने विशेष स्वागत् समारोहमा सहभागी हुनेछन् ।

त्यसपछि उनले राजघाटस्थित महात्मा गान्धीको समाधिस्थलमा पुगी श्रद्धाञ्जलि अर्पण गर्नेछन् ।

प्रधानमन्त्री ओलीले शनिबारै हैदरावाद भवनमा भारतीय प्रधानमन्त्री नरेन्द्र मोदीसँग आपसी हितका विषयमा वार्ता गर्नेछन् ।

नयाँ दिल्लीमा रहँदा प्रधानमन्त्री ओलीले भारतका राष्ट्रपति मुखर्जी र उपराष्ट्रपति मोहम्मद हमिद अन्सारीसँग पनि भेटवार्ता गर्नेछन् ।

उनले भारतीय विश्व सम्बन्ध परिषदका साथै भारतीय व्यापारिक समुदायको एक कार्यक्रमलाई सम्बोधन गर्ने कार्यतालिका छ ।

उनी प्रमुख भारतीय सन्चारमाध्यम र नेपाली समुदायसँगको एउटा अन्तरक्रिया कार्यक्रममा पनि सहभागी हुनेछन् ।

प्रधानमन्त्री ओलीले उत्तराखन्डको तेहरी जलस्रोत परियोजनाको पनि निरीक्षण गर्नुकासाथै गुजरातको भुज पुगेर त्यहाँ भूकम्पपछि थालिएको पुनःनिर्माणका कार्यबारे जानकारी लिनेछन् ।   इमेजखबरमा समाचार छ ।