भारतीय संचारमाध्यमले आज जनाए अनुसार, भारतले आज ब्राहमोस दुइ ढाँचे सुपरसोनिक क्रुस क्षेप्यास्त्रको सफलताका साथ प्रक्षेपण गरेको छ। भारतीय रक्षा अनुसन्धान तथा विकास संगठनका पदाधिकारीले उक्त क्षेप्यास्त्र भारतको पूर्वी भागमा पर्ने उडिसा प्रदेशको समुद्र किनारमा पर्ने प्रक्षेपण स्थलबाट प्रक्षेपित गरिएको जानकारी दिएका छन। थाहा भए अनुसार, ब्राहमोस दुइ ढाँचे सुपरसोनिक क्रुस क्षेप्यास्त्र भारत तथा रुसको संयुक्त विकासमा गरिएको हो। यस क्षेप्यास्त्रको दूरी दुइ सय नब्बे किलोमिटर छ र तीन सय केजी परमाणु अस्त्र बोक्न सक्छ। हाल यस सम्बन्धि अनुसन्धान आकाशतिर प्रक्षेपण गर्नसकिने तथा समुद्रमुनी प्रक्षेपण गर्न सकिने क्षेप्यास्त्रमा केन्द्रित रहेको जनाइएको छ।

माओवादी सभासद् बालकृष्ण ढुंगेललाई सर्वस्वसहित जन्मकैदको फैसलाको पूर्ण पाठ सर्वोच्च  अदालतले आइतबार सार्वजनिक गरेको छ । सशस्त्र द्वन्द्वका बेलाको कर्तब्य ज्यान मुद्दामा सर्वोच्चले गत पुस १९ गते ढुंगेललाई सजाय हुने फैसला गरे पनि पूर्ण पाठ तयार नभएकाले त्यसको कार्यान्वयन हुन सकेको थिएन । अब भने उनलाई कारबाहीको बाटो खुलेको सर्वोच्चले जनाएको छ । 'अब फैसला सम्बन्धित जिल्ला अदालतमा पुग्नेछ' सर्वोच्चका सहायक प्रवक्ता हेमन्त रावलले भने,'त्यस लगत्तै कार्यान्वयनको प्रक्रिया सुरु हुनेछ ।'  ढुंगेल संविधानसभा निर्वाचनमा ओखलढुङ्गा- २ बाट निर्वाचित भएका थिए । ओखलढुंगाकै गणेशकुमार श्रेष्ठले आफ्नो भाइ उज्जनकुमारलाई २०५५ असार १० मा  ओखलढुंगाको खहरे खोलाको दोभानमा ढुंगेलले गोली हानी हत्या गरेको भन्दै उनी विरुद्ध प्रहरीमा जाहेरी दिएका थिए ।

भारतको वावागन्ज स्थित रेल स्टेसन नजिकै एक जना नेपाली महिलाको काटिएको अबस्थमा लास फेला परेको छ ।  नेपालगन्जबाट १५ किलोमिटर दक्षिण पर्ने उक्त रेलस्टेसनमा अछाम धमाली गाबिस-६ की चन्दा जीसीको लास फेला परेको प्रहरीले जनाएको छ । जीसीको लास रेलको लिक नजिक दुई टुक्रा भएको अबस्थामा आईतबार फेला परको हो । चन्द्रा ६ महिना देखि आफनो लोग्ने बासुदेव जीसीका साथ वावगन्जमा मजदुरी गरी बस्दै आएकी थिईन । शनिबार दिउसो  चन्द्रालाई  रेल स्टेशनमा आत्महत्या गर्ने क्रममा स्थानीयले फेला पारेर  जोगाएका थिए । 

 

 

माओवादीका पोलिटव्युरो सदस्य हरिबोल गजुरेल 'शीतलकुमार' ले संवैधानिक बाटो अवरुद्ध पारिए आफ्नो पार्टी पुनः विद्रोहको झण्डा उठाउन बाध्य हुने चेतावनी दिएका छन्। आफ्नो पार्टीलाई अहिले पनि संवैधानिक बाटोबाट हिँड्न नदिने षड्यन्त्र भइरहेको भन्दै सो चेतावनी दिएका हुन्। किरात गणराज्य टावर निर्माणका लागि 'चलचित्र दशगजा' प्रदर्शनबाट उठेको रकम हस्तान्तरण कार्यक्रममा नेता गजुरेलले हाल जारी केन्द्रीय समिति बैठकमा पनि यही विषयमा छलफल भइरहेको र बैठकले सशक्त निर्णय गर्ने खुलासा गरे। 'यो विवादले पार्टीको नयाँ विचार, नीति र योजनालाई नयाँ उचाइमा पुर्‍याई पार्टीलाई एकताबद्ध बनाउनेछ', उनले भने। सो अवसरमा उनले किराती जनसाँस्कृतिक परिवारको पहिलो गीति दस्तावेज 'तायजोङ्गको आवाज' एल्वम् विमोचन गरेका थिए।

राष्ट्रपति शासनको पक्षमा वकालत गर्दै आएका नेपाल मजदुर किसान पार्टीका अध्यक्ष नारायणमान विजुक्छेले राष्ट्रपति शासनको सम्भावना रहेको बताएका छन् । प्रधानमन्त्री निर्वाचनपछि संसद् भवन परिसरमा सञ्चारकर्मीसित कुरा गर्दै विजुक्छेले तर दलहरुले आफूले खाएको सुविधा खोसिने डरले दलहरु राष्ट्रपति शासनको विपक्षमा उभिएको बताए । 'राष्ट्रपति शासनको सम्भावना छ,' उनले भने, 'तर यसका लागि मन्त्रिमण्डलले लिखितरुपमा निर्णय गर्नुपर्छ, आफूले खाएको भाग छाड्न उनीहरु तयार छैनन् ।' विजुक्छेले राष्ट्रपति शासन लगाए अहिलेका सवै समस्या अन्त्य हुने बताए । 'राष्ट्रपति शासन लगाए अहिलेको भ्रष्टाचार र अराजकता पनि अन्त्य हुन्छ,' उनले भने ।

भारतको राजधानी नयाँ दिल्लीमा डेँगु रोग लागेका मानिसको संख्या वृद्धि भएको छ। अधिकारीको तथ्याङ्कअनुसार, एक हजार भन्दा बढीमा उक्त रोग लागेका छन् भने तीन जनाको मृत्यु भइसकेको छ। उक्त संख्या गत पाँच वर्षको तुलनामा दश गुणा पुगेको छ।

गोर्खाबाट काठमाडौं आइरहेका माओवादी उपाध्यक्ष डा. बाबुराम भट्टराईको गाडीमाथि त्रिशूली खण्डमा एक बसले शङ्कास्पद तरिकाले ठक्कर दिएको छ। मुगलिन-गजुरी खण्डमा पर्ने चितवन दारेचोक गाविस-९ तिस्लिङमा बिहान ११ : १० मा उनी चढेको वा १ छ ७५८ नं. को गाडीमा लु १ ख ६१३९ नं. को बसले ठक्कर दिएको हो। ठक्कर दिए पनि उनी दुर्घटनाबाट जोगिएका छन्। बुटवलबाट काठमाडौं आइरहेको गाडीले भट्टराई चढेको गाडीमा शङ्कास्पद तरिकाले ठोक्काएको उनका सहयोगी विश्वदीप पाण्डेले बताए। 'हामी दुई किलोमिटर परैबाट अगाडि जान हर्न दिइरहेका थियौं तर बस ड्राइभरले साइड दिइरहेका थिएनन्', पाण्डेले नागरिकन्युजसँग भने- बल्लबल्ल बसले प्रहरीको स्कर्टिङलाई साइड दियो, त्यसको पछिपछि जाँदा असहज ढङ्गले पछाडिको भागमा गाडी ठोक्कायो। जसबाट गाडीको ढोका कुच्चिएको छ।

माओवादी अध्यक्ष पुष्पकमल दाहालले आफ्नो पक्षमा मत दिन आग्रह गर्दै शुक्रबार राष्ट्रिय प्रजातन्त्र पार्टीका शीर्ष नेताहरुसँग छलफल गरेका छन् । लोकन्थलीस्थित राप्रपा नेता लोकेन्द्रबहादुर चन्दको निवासमा चन्दसहित राप्रपा अध्यक्ष पशुपतिशम्शेर जबरासाग छलफल गरेका छन् । भेटमा राजनीतिक गतिरोध अन्त्य गर्ने विषयमा छलफल भएको राप्रपाले जनाएको छ । चन्द, राणा र दाहालबीच प्रधानमन्त्रीको निर्वाचन, शान्तिप्रक्रियाका विषयमा छलफल भएको अध्यक्ष राणाले बताए । राणाका अनुसार अध्यक्ष दाहालले यही भदौ २० गते हुने प्रधानमन्त्री निर्वाचनमा आफूलाई सघाउन आग्रह गरेका थिए । राप्रपाले पाँच चरणको निर्वाचनमा कांग्रेस उम्मेदवार रामचन्द्र पौडेललाई मत दिंदै आएको छ ।