होटलमा कोरोना खोप लुकाइयो, बिर्तामोड नगरपालिकाका कर्मचारी पक्राउ

होटलमा कोरोना खोप लुकाइयो, बिर्तामोड नगरपालिकाका कर्मचारी पक्राउ


उमाकान्त खनाल देशसन्चार

झापा- कोरोनाविरुद्धको खोप पाउन सर्वसाधारण घाममा तातिइरहँदा आफू निकट मानिसलाई लगाउनका लागि होटलमा लुकाएर राखिएको भेरोसेल खोपसहित बिर्तामोड नगरपालिकाका कोभिड फोकल पर्सन ओम खड्कालाई प्रहरीले पक्राउ गरेको छ।

कोरोनाविरुद्धको खोप मापदण्ड विपरित आफू निकटलाई दिने गरेको सार्वजनिक भइरहेका बेला खड्का पक्राउ परेका हुन्।

नेपाली कांग्रेस तथा नेकपा माओवादी केन्द्रका कार्यकर्ताले बिर्तामोडको होटल टाइमलेस मोमेन्ट्समा खोपसहित खड्कालाई रंगेहात समातेर प्रहरीको जिम्मा लगाएका हुन्।

खड्का पक्राउ परिसकेको र आवश्यक कानुनी कारबाही हुने जिल्ला प्रहरी कार्यालय झापाका प्रवक्ता प्रहरी नायव उपरीक्षक राकेश थापाले जानकारी दिए। खड्कालाई आवश्यक अनुसन्धानका लागि इलाका प्रहरी कार्यालय अनारमनी बिर्तामोडमा राखिएको उनले बताए।

केही दिनयता खड्काले सो होटलमा आफ्ना नजिकका मानिसलाई बोलाएर खोप लगाउने गरेको सूचना पाएपछि नेपाली कांग्रेस र माओवादी केन्द्रका कार्यकर्ताले खड्कालाई नियन्त्रणमा लिएर प्रहरीलाई खबर गरेका थिए।

खड्काले भने आफू होटेलमै क्वारेन्टिनमा रहेकाले त्यहीँ खोप ल्याइएको दाबी गरेका छन्। उनले स्वास्थ्य कार्यालय झापाबाट पठाएको खोप त्यहाँ जिम्मा लिएको बताए।

अन्य समाचारहरु