गायक जेबी टुहुरेको निधन

गायक जेबी टुहुरेको निधन


करन जङ रायमाझी 

प्रगतिशील, जनवादी, क्रान्तिकारी  गायक जेबी टुहुरेको निधन भएको छ। केही दिनअघि राजधानीको बयोधा अस्पतालमा उपचारका लागि भर्ना भएका टुहुरेको बिहीबार साढे १२ बजे निधन भएको राष्ट्रिय नाचघरको पूर्वमहाप्रवन्धक राजेश थापाले जानकारी दिए ।


उनी ७८ वर्षका थिए। उनलाई मुटुसम्बन्धी समस्या, फोक्सो, मधुमेह  र उच्च रक्तचापको समस्या थियो। 

गत मंगलबार उनलाई मष्तिष्कघात भएको थियो। 

उनको शव श्रद्धाञ्जलीका लागि बिहीबार दिउँसो  १ देखि २ बजेसम्म पेरिसडाँडास्थित माओवादीको पार्टी कार्यालयमा राखिनेछ। त्यसपछि अन्तिम संस्कारको लागि उनको शव पशुपतिम लगिनेछ। 

जनगायक जेबी टुहुरे वि.सं. २००१ कात्तिक १५ गते धरानमा जन्मिएका थिए।

उनी पिता कृष्णबहादुर खड्गी, माता दानदेवी खड्गीका जेठो छोराको रूपमा जन्मिएका थिए।

जेबी टुहुरेको वास्तविक नाम जुटबहादुर खड्गी हो। जब २०२१ सालमा उनका पिताको निधन भयो, त्यसपछि उनले आफ्नो नामको पछाडि टुहुरे जोड्न थालेका हुन्।

उनी कम्युनिष्ट आन्दोलनलाई गीतको माध्यमद्वारा अगाडि बढाउने सर्जक भनेर चिनिन्छन्।

पञ्चायतकालदेखि नै कम्युनिष्ट पार्टीमा लागेर उनले कैयन गीत गाए, बुढापाका र महिलाहरूलाई कम्युनिष्ट आन्दोलनमा आकर्षित गराए।

उनले गाएको ‘आमा दिदी बहिनी हो’ बोलको गीत उनको सबभन्दा लोकप्रिय गीत हो। यो गीतको साथमा नेकपा एमालेले पूर्वदेखि पश्चिमसम्म टुहुरेलाई आफ्ना चुनावी कार्यक्रममा लैजान्थ्यो।

एक समय टुहुरेकै कारण एमालेले चुनाव जित्यो भन्नेहरू पनि थिए। तर उनै टुहुरे जीवनको उत्तरार्द्धमा आइपुग्दा भने नेकपा एमालेमा रहेनन्। उनी २०७० सालमा माओवादीमा प्रवेश गरेका थिए।  

केही समाचार स्रोत: सेतोपाटी
गायक जेबी टुहुरेको निधन

अन्य समाचारहरु