हिजोको दुश्मन आजको साथी (कबिता)

हिजोको दुश्मन आजको साथी (कबिता)


(राजु खनाल


समय र सत्ताले

आज हामीलाई एकै ठाउँ उभ्याएको छ

हिजो दुश्मन ठान्ने एक अर्कालाई

आज एउटै घरको छतमुनी ल्याएको छ।


जसलाई हिजो म जङ्गलको स्याल भन्थे

आज उहीँ मेरै घरको बाघ भएको छ 

हिजोको दुश्मन आजको साथी

चुनावको लट्ठी भएको छ

समय र सत्ताले

हामीलाई एकै ठाउँ उभ्याएको छ ।



अब चिन्ता छैन

कपाल फुलेकाले हार्ने छैन

युवा जोस र जागर,प्रतीक्षा गर

अर्को चुनावमा फुट्ने छौँ

तालमेल हुने छैन ।



हिजो बाघ एक्लै घुम्थ्यो

आज बाघै बाघको जङ्गल भैसक्यो

खानलाई आहारा छैन

भोकै बस्न सक्ने कोहि छैन

एकदिन त जङ्गल फुट्नेछ

बाघैलाई मारेर बाघ बन्ने समय आउनेछ ।



हिजोको दुश्मन आजको साथी

चुनावको लट्ठी भएको छ

समय र सत्ताले

हामीलाई एकै ठाउँ उभ्याएको छ ।