बाँगीको कुजेरीका एक जनाको दिल्लीमा निधन | भारतमा २२ दिनको अवधीमा ९ जना अर्घाखाँचीबासीको निधन

बाँगीको कुजेरीका एक जनाको दिल्लीमा निधन | भारतमा २२ दिनको अवधीमा ९ जना अर्घाखाँचीबासीको निधन


अर्घाखाँचीडट्कम संवाददाता 

दिल्ली, भारत (अर्घाखाँचीडट्कम) । अर्घाखाँची जिल्लाको मालारानी गाँउपालिका वार्ड नम्बर ५ बाँगीको कुजेरीका एक जनाको हृदयघातका कारण भारतको राजधानी नयाँ दिल्लीमा निधन भएको छ । 


बाँगीको कुजेरीका ४५ वर्षिय श्री किसन थापाको हिजो सोमबार हृदयघातका कारण दिल्लीमा निधन भएको हो । 

नारायण शर्माले अर्घाखाँचीडट्कमलाई जानकारी गराए अनुसार मोटर-पार्ट्स को व्यवसायी गर्दै आएका थापाको सोमबार बिहान घरमा हृदयघातका कारण निधन भएको थियो । 

 मृतकको दिल्लीमा दाहसंस्कार गरिएको छ ।

२२ दिनको अवधीमा ९ जनाको मृत्‍यु 

उता अर्घाखाँचीडट्कमलाई प्राप्त समाचार तथा विवरण अनुसार योसँगै भारतमा गत चैत्र ३१ गते यता २२ दिनको अवधीमा विभिन्न कारणले ९ जनाको मृत्‍यु भएको छ ।    

शितगंगा नगरपालिका वार्ड नम्बर ३ ठाडा हटियाका राम बहादुरका ३३ वर्षिय साईलो छोरा सुभास कुमारको गत वैशाख १७ गते शुक्रबार हृदयघातका कारण दिल्लीमा निधन भएको थियो । 

नुवाकोटको चिचौरका ३७ बर्षिय दिपक सुनारको गत वैशाख ११ गते शनिबार कोरोना संक्रमणका कारण उपचारको क्रममा नयाँ दिल्ली स्थित ग्रेटर कैलाशमा मृत्‍यु भएको थियो ।

यस्तै ढिकुराका भिम बहादुर सुनारका ३२ बर्षिय छोरा बिष्णु सुनारको वैशाख ११ गते शनिबार नै भारतको राजस्थानमा कोरोना संक्रमणबाट निधन भएको थियो  ।

साथै  २०७८ वैशाख ८ गते बुधवार मालारानी गाउँपालिका वार्ड नम्बर -५ बाँगीको गोवदी सिरानका स्वर्गीय राम बहादुर खड्काका २६ वर्षिय  छोरा विरेन्द्र खड्काको दिल्ली स्थित तिसहजारी भैरव मन्दिरमा निधन भएको थियो । 

यस्तै ढाकावाङको साम्नेगाउँका चुरामणी खनालका ४१ वर्षीय छोरा धनिस्वर खनालको वैशाख ६ गते सोमबार कोरोना संक्रमणका कारण भारतको दिल्लीमा निधन भएको थियो । 

साथै कोरोना संक्रमणका कारण वैशाख ५ गते आइतवार भुमिकास्थान नगरपालिका वार्ड नम्बर  ३ धारापानीको बादखर्कका टामसोर भुसालका ४० वर्षका छोरा हुमप्रसाद भुसालको भारतको  गुडगाउँमा  मृत्‍यु भएको थियो । 

यस्तै  हृदयघातका कारण गत चैत्र ३१ गते मंगलवार सन्धिखर्क नगरपालिका वार्ड नम्बर - ९ अर्घाको मसनडाँडाका खुमान सिंह विकका ३७ वर्षिय माईला छोरा फर्सुराम पवन विकको भारतको कलकत्तामा निधन भएको थियो ।  



ढाकावाङका एक पुरुषको पन्जावमा निधन | भारतमा १७ दिनमा ५ जना अर्घाखाँचीबासीको निधन

अन्य समाचारहरु